عن آداب إنجليزي

-إيه الأقسام اللي في آداب؟ 
الكلية فيها 14 قسم منهم 5 أقسام لغات,ومن المفترض لما نتنقل للمبنى الجديد(جوه الجامعة)على بداية السنة الجديدة تفتح أقسام لغات تانية زي الصينية والإيطالية والألمانية بس مافيش معلومات مؤكدة عن الموضوع ده. 

-ايه المطلوب عشان أدخل قسم لغة إنجليزية؟
وانت بتقدم في الكلية بتاخد ورقة رغبات وبتملاها بالأقسام اللي عايزها,وكل سنة بتتحدد درجة معينة عشان تدخل القسم,درجة مادة الإنجليزي اللي جيبتها في ثانوي.الدرجات بتختلف من سنة لسنة,في سنوات لو كنت نقصت نص درجة عن الدرجة المطلوبة هتدخل القسم عادي,وعلى الرغم من كده في السنة اللي أنا قدمت فيها اللي ناقص نص درجة عن المطلوب مادخلش لأن العدد كان كبير.فما تسمعش لتوقعات حد واستنى لحد ما نتيجة الأقسام تظهر. 

-بندرس ايه في آداب إنجليزي؟
آداب جمع كلمة أدب,في قسم لغة إنجليزية بندرس الأدب الإنجليزي( بشكل أساسي البريطاني) زي مسرحيات-شعر-رواية-قصص قصيرة-تاريخ الدولة...الخ.
في الترم بيكون فيه 6-7 مواد.المواد ممكن يكون من ضمنها مادة مالهاش علاقة بالقسم(زي العربي أو لغة أجنبية ثانية) أو بتدرس مادة باللغة العربية.

-ممكن مثال عن المواد؟
المواد بتختلف من جامعة لجامعة,أنا في جامعة المنصورة.
الدكاترة قالولنا ان النظام هيتغير شوية بداية من السنة الجاية.عامة في الترم الأول في سنة أولى بتدرس:استماع ومحادثة,مدخل للدراما,صوتيات,ترجمة,مقال,مهارات قراءة وفهم استماع,مدخل الى النقد.
الترم التاني:مدخل للرواية,لغة عربية,تحليل نصوص,تاريخ الأدب,لغة أوروبية حديثة.تاريخ انجلترا,مدخل الى الشعر,حقوق إنسان.
المواد في سنة أولى بسيطة ان شاء الله دون ووري. 

مثال لمواقع بتحلل الأعمال الأدبية http://goo.gl/lk4NGb

-ايه الكورسس اللي محتاجها أثناء الدراسة؟
خلينا نتفق على حاجة:

الكلية فيها نوعين من الناس: ناس بتحضر وبتسجل المحاضرات مع الدكتور,مش شرط تكون دحيحة ويطلعوا من الأوائل بس ع الأقل بتحضر وبتابع مع الدكاترة,وبتعتمد على نفسها .وناس بتكبر دماغها,بتحضرعشان تتكلم وتاخد courses وتجيب ورق مذكرات سواء من أول سنة أو في آخر كام شهر. أنا من النوع الأول,وضد الcourses في كلية آداب إنجليزي. ده معناه ان الورق والكورسس كلها وحشة؟, هو أنا واخدة موقف مضاد ليها لأسباب كتير ومن معاصرتي للكلية ولنظامهم,وبشوفها استغلال بحت,ولكن نادرًا ممكن أجيب ورق الكورسس لو قفلت معايا خالص والدكاترة ماكانوش مساعدين,بس ده حصل في السنتين مرة واحدة فقط وفي مادة الدكتور ما دخلناش فيها أساساً. 

ولأني من الجزء الأول فكلامي هيكون من وجهة النظر ده,وانت لك الخيار.مهم ما تخليش حد يوجهك لإتجاه معين لأن في بداية السنة بيستغلوا الطلاب الجدد وتوهانهم وبيحاولوا يكسبوا ودهم ويستغلوهم.واحنا بنحاول نساعدكم من تجربتنا وهنحاول نكون موجودين نساعد الطلاب اللي داخلة جديد ان شاء الله. 


- أنا هعدي في الكلية ازاي/المهارات اللي محتاجها؟
مطلوب انك تكون عارف أساسيات الإنجليزي,تكون مستعد تعتمد على نفسك بشكل كبير وتتابع نفسك لأن مافيش ميدتيرم.وصدقني رغم المجهود اللي هتبذله في انك تعمل الحاجة بنفسك,الحاجات الي هتعملها وتلخصها هتفهمها ومش هتكون محتاج تحفظ وتصم والحاجة هتثبت في دماغك.

طب ونظام الدكاترة؟

 الدكاترة بتختلف فيه اللي بيرميلك أول الخيط ويسيبك وفيه اللي بيساعدك كل شوية وبيدُلك على الطريق,وفيه اللي مستني انك تسأله,وفيه مش بيرمي أي حاجة خالص.معظم الدكاترة هتساعدك لو طلبت منهم المساعدة.حاول تتعرف كمان على الناس خاصة الناس المجتهدة-ودول هيتعرفوا سواء من الجروب بتاع الدفعة أو بالتدريج هتعرفهم-وتساعدوا بعض لأن الكلية محتاجة انك تتعاون مع غيرك وما تكونش أناني,صدقني هتستفاد جدًا. 

كمان أغلب المعيدين كويسين متعاونين للغاية وبيساعدوك من غير ما تطلب سواء يرشدوك لطريقة المذاكرة أو لتطوير الإنجليزي بتاعك. 

ايه العقبات اللي هتقابلني؟

1-الكلية مليئة بالناس اللي مش في دماغها واللي أدوا سمعة مش كويسة للكلية,وصعب انك تلاقي الناس الكويسة لأنهم مش ظاهرين وفي حالهم,و الأنشطة بتتمركز على الحفلات والرحلات فمافيش أنشطة تساعدك.

2-مش عايزة أحبطك بس فيه دكاترة بيدوا حد أقصى من الدرجات ماحدش بيزيد عنه حتى أوائل الدفعة ففي كلا الأحوال طالما عارف انك اجتهدت خلاص ربنا هيوفقك أيا كانت النتيجة.

3-زي ما قلت في ناس هتحاول تستغل جهلك بنظام الكلية بطريقة مش كويسة. 

 ايه مجالات الشغل؟ 

أي حاجة فيها لغة إنجليزي ممكن تدخل فيها.أنا كرضوى مهتمة بالترجمة والأدب فبحاول أظبط نفسي في مجال الترجمة.ممكن تشتغل ترجمة تحريري وشفهي كمرشد سياحي مثلًا,فيه ناس بتقدم في المطارات سواء شغل في المطار أو مضيفين,وفيه ناس بتقدم في سياحة وفنادق,ممكن تشتغل في بنك,تاخد دبلومة وتدرس في مدرسة حكومة او تشغل في مدارس كولدج وإنرناشونال وتقريبا مش بتحتاج دبلومة تدريس بس لازم الإنجليزي بتاعك يكون كويس جدا.عامة في الأغلب هتحتاج تتعلم مهارة تساعدك مع الإنجليزي وده حسب اهتمامك المجالات مفتوحة ما أقدرش أحصرها وخريج آداب بيكون ليه الأفضلية أحيانًا في الوظايف لأنه من المفترض انه متخصص لغة. 

الكلية هتساعدني في تطوير الإنجليزي؟

الكلية هتوفرلك الماتيريال,بمعنى هتساعدك ان الإنجليزي يبقى قدامك وحواليك وبالتالي لو انت بذلت مجهود وحاولت تذاكر وتبحث عن طرق تطور نفسك هتلاقي الإنجليزي بيتظبط,غير كده فالكلية كمواد مش بتساعدك على تطوير الإنجليزي ولازم تدور بنفسك.

أطور الإنجليزي إزاي؟ 

ده موضوع كبير,الإنجليزي 4 مهارات:إستماع,محادثة,كتابة,وقراءة.فيه طرق ووسائل كتير جداً,  تلخيصًا للرغي شوف سلسلة سُبل.

في أماكن فيها أنشطة تساعدني بره الكلية؟

آه,

-فيه كيان ظهر جديد اسمه Mansoura conversation club فيه ايفينت خاص بيه بداية من بكره.

-تقدر تلاقي معلومات تفصيلية عن أماكن تانية هنا: كورسس وأنشطة.
-مواقع تقدر منها تتكلم إنجليزي
-السفارة الأمريكية 

انتِ ممكن تساعديني ازاي؟ 

احنا بنحاول نساعد الناس على قد ما نقدر,برحب بأي سؤال يخص الكلية حابب تسألني عليه.وعشان زي ما قلت مافيش أنشطة,مجموعة منن-ومعانا معيدات- عملنا English club بنتجمع في مكان معين في الكلية وبنتكلم إنجليزي سوا كتدريب.حاليًا هو مقتصر على دفعتنا بس لو هنعمل كيان في الكلية هيكون ده من ضمن أنشطته وهنحاول نتوسع. انت مش محتاج تنتظرنا وتقدر تعمل ده انت وزمايل معاك بمنتهى البساطة. 

فيه ناس أعرفها أكتيف على أسك ومتعاونين تقدر تسألهم اللي انت عايزه,وتقدر تستفيد منهم لو تابعتهم على أسك أو الفيس:
@MennaidRizk
@mohamedadel77

ولو فيه أي أسئلة تانية تقدر تسألني هنا:@RadwaMahmoud415

نأسف للغاية على الإطالة :)